Maanta oo taariikhdu tahay 11kii bisha August 2025 markaan maqlay geeridii naxdinta lahayd ee gabyaagii weynaa Daa'uud Cammir Diiriye*, waxan markiiba xusuustay maanso aan hore ugu xusay naxdin tan oo kale ah. Wuxu bilowgeedu ahaa:
Xiddigihii Dilaadee
Daadanaayey waayadan
Maantana qod baa dumay
Dabaysha igu soo furay.
Hase yeeshee waxa haddana markiiba naftu hollatay inaan
maansadan gaaban ee soo socota aan ku xuso taariikdii Daa'uud oo ahayd mid aad
u dheer oo u baahan in la urursho oo la qoro. Waxay tidhi:
Wuxuu daa'in qoray iyo
Geeri baan ku daynine
Daa'uud hadduu tegay
Dilla yaa u sheekayn
Yaa maaweelin dooxii
Kaftan aan la diidayn
Oo weliba duur xul ah
Oo dur iyo daabac ah
Dadku ay isku weriyaan
Yaa arar ku sii dayn
Soo dhigi daleedaha
Ayaa gabay da' weyn iyo
U dooyeysan geeraar
Dabaylaha dhacaayiyo
Wixii duugmay waa hore
Ama daalalay iyo
Foocaar dusheediyo
Daruuraha wixii yaal
Ayaa diirada u xidhan
Da' yartiyo carruuraha
Ayaa uga dardaar werin
Sidii xarafyo diineed
Laabta ugu daabici
Dulmi iyo xumaan iyo
Wixii duuma cudur jira
Ayaa diidi oo nici
Xaqa yaa ku daakiri.
Allow deeqsi ma ahaa
Hayin ubad ma daadsha ah
Waayeel dareenliyo
Dun xariir ah ma ahaa
Dugsi lagu caweeyiyo
Suugaan dayaantoo
Buugag lagu daleeyiyo
Taariikh duuban ma ahaa
Intaad dunida joogtiyo
Noloshii na deeqdaye
Allow daarta aakhiro
Da'santaad la heestiyo
Dirkii gacan macaan iyo
Gabayaagi dookhiyo
Tixda kugula doodiyo
Xaamud kuu damaashaad
Gacan ubax ku deeqsii
Cali Tadhase deexiyo
Qosol kugu dawaafsii
Jaamac daaro kuu gogol
Dadkii aad jeclayd iyo
Culimadi dilaad iyo
Duqeydaad u oydiyo
Awliyada dawaaftiyo
Nabigii la dayr noqo!
Bashir Goth, 11 August 2025.
*Daa'uud Cammir Diiriye wuxu aasaase, hal abuure iyo majaajilayste ka ahaa kooxdii fanka ee Bons Bras ee ka abuurantay magaalada Jubuuti sanadkii 1955 kana dhalatay kooxdii saddexaad ee Balwada. Markii dambana wuxu aasaase ka ahaa kooxdii Gacan Macaan ee fanaaniinta badan dhashay. Wuxuna ku dambeeyey deegaankii uu ku dhashay ee Dilla oo uu ka noqday beer qodaal. Wuxuna tiriyey tix aad u badan oo gabay, geeraar iyo madadaadlaba leh oo reebtay mahadhooyin iyo murti badan, Daa'uud markuu dhintay cimrigiisu wuxu ahaa boqol ku dhawaad.